Ministè Jistis ak Sekirite Piblik (MJSP) anonse li mete kanpe yon komisyon suivi pou pran an chaj viktim atak 24 desanm 2024 la nan Lopital Jeneral kote 2 jounalis ak yon polisye te pèdi lavi yo, plis plizyè lòt ki te blese
Komisyon sa a ki dwe asire suivi pou pran viktim yo, paran yo oswa dependan yo an chaj genyen laden li yon reprezantan sendika jounalis yo, 2 reprezantan sendika Lapolis yo, yon avoka bawo Pòtoprens ak yon reprezantan Ofis Pwoteksyon Sitwayen (OPC) kòm obsevatè.
Se reprezantan sendika jounalis yo k ap kowòdone komisyon an. Minis Jistis ak Sekirite Piblik la, Mèt Patrick Pélissier, pran desizyon monte komisyon sa a nan kad repons rapid gouvènman an vle bay pou evènman trajik sa a ki te rive nan Lopital Jeneral la.
N ap raple nan yon kominike nan dat 26 desanm 2024, Premye Minis Alix Didier Fils-Aimé te pran angajman san mank konsènan trajedi Lopital Jeneral la pou li te pran an chaj frè medikal blese yo, peye frè fineray polisye a ak de (2) jounalis ki mouri yo, epi pote yon soutyen materyèl ak sikolojik bay fanmi viktim yo.
