Doktè Frantz Lamour
Entwodiksyon
Fè lajan nan bon kondisyon pa fasil okenn kote sou latè. Sa mande devouman, planifikasyon estratejik, ak rezistans. Nan yon peyi tankou Ayiti, kote defi ekonomik yo difisil anppil, rive fè siksè finansye kapab sanble yon bagay enposib. Sepandan, ak bon mantalite, konesans, ak detèminasyon, li kapab posib pou yon Ayisyen ki an Ayiti rive gen lajan. Atik sa a founi je gade ki estrateji ak prensip ki ka louvri wout siksè a pou moun ki pa pè travay epi ki pa pè pran ris. Li bay lide ak enspirasyon pou moun ki vle antre nan yon eksperyans pwosperite pou yo menn, pou fanmi yo ak pou tout sosyete a.
Chemen pwosperite nan yon peyi kote defi ekonomik yo souvan kouvri opòtinite yo chaje ak pikan kwenna. Fòk ou gen kran pou antre ladan li. Sepandan, nan mitan advèsite, se la ki genyen potansyèl pou inovasyon, kwasans, ak siksè. Lè nou respekte prensip estratejik yo ak lè nou montre detèminasyon san kondisyon nan sa nou vle reyalize a, nou kapab rive atenn objektif nou te fikse yo lè nou t ap antre nan chemen sa a. Menm si nou pa nye ensekirite ak vyolans gang poze gwo defi an Ayiti, li esansyèl pou nou rekonèt advèsite souvan mennen rezistans ak inovasyon. Malgre pwoblèm ki genyen yo, gen fason pou moun reyalize pwosperite. Lè nou konprann kontèks defi sa yo epi adopte apwòch estratejik yo, nou kapab toujou kreye mwayen pou nou reyisi nan mitan ensètitid.
Antreprenarya
Youn nan chemen Ayiti ki kapab pi efikas pou gen siksè ekonomik, se atravè antreprenarya. Nou ta kapab idantifye bezwen ki pa satisfè nan mache a epi kreye solisyon tou nèf ki kapab mennen nan opòtinite biznis pou fè lajan. Kit se kòmanse yon ti antrepriz oswa lanse yon demaraj teknolojik, antreprenarya ofri potansyèl pou pwogrè finansye ki gen nannan.
Envestisman Estratejik
Envesti avèk sajès se yon lòt aspè enpòtan nan mwayen pou moun fè richès. Sa mande pou nou gade divès opòtinite envestisman, soti nan byen imobilye, aksyon ak obligasyon, ki kapab rapòte gwo benefis enpòtan. N ap bezwen konprann tandans mache a, fè rechèch apwofondi, epi chèche konsèy nan men ekspè finansye pou ede nou diminye ris yo epi ogmante pwofi yo.
Edikasyon ak devlopman ladrès
Lè yon moun envesti nan tèt li atravè edikasyon ak devlopman konpetans, sa esansyèl pou siksè alontèm. Chèche genyen konesans espesyalize ak devlopman ladrès espesyal enpòtan anpil pou pèmèt moun sa a jwenn yon bon travay epi pou li byen touche. Si moun nan ap pouswiv edikasyon siperyè oswa si l ap resevwa fòmasyon pwofesyonèl, li bezwen toujou ap aprann pou li bay tèt li atou ki gen anpil valè sou chemen ki mennen nan siksè a.
Disiplin finansye ak planifikasyon
Bati richès mande abitid finansye disipline ak planifikasyon estratejik. Nou bezwen fikse objektif finansye ki klè, fè yon bidjè efikas, epi viv pi ba pase mwayen nou si nou vle vin gen lajan tout bon. Anplis de sa, nou bezwen tou etabli plizyè sous revni epi etabli priyorite ekonomik ak envestisman, pou nou kapab fè richès nou ogmante pi vit.
Rezo ak kolaborasyon
Bati rezo pwofesyonèl solid ak ankouraje relasyon kolaborasyon ka louvri pòt pou nouvo opòtinite ak antrepriz. Rezo moun ki gen lide, k ap bay bon konsèy, ak envestisè potansyèl yo ka bay lide, sipò, ak resous ki nesesè nan wout siksè a. An Ayiti, menm jan ak lòt kote, gen anpil istwa sou moun k ap pwofite gwo chans pou yo rive jwenn siksè tout moun ka wè, menm nan mitan ensekirite ak vyolans gang. Istwa sa yo sèvi kòm rapèl puisan pou montre baryè yo pa enfranchisab. Chak istwa siksè se yon temwayaj sou rezistans ak entèlijans lespri nou kòm moun. Si lòt moun te pwofite chans yo pou yo vin gen siksè, sa montre potansyèl la nan tout moun pou trase chemen yo nan wout pwosperite. Aspirasyon nou yo, detèminasyon nou ak planifikasyon estratejik yo ka louvri wout la pou nou vin pwochen moun y ap pale de li kòm moun ki fè gwo siksè.
Konklizyon
Fè siksè an Ayiti se pa sèlman yon rèv byen lwen men se yon objektif ki ka reyalize atravè pèseverans, inovasyon, ak planifikasyon estratejik. Nou kapab rive gen pwosperite finansye ak siksè lè nou anbrase antreprenarya, fè envestisman pridan, bay edikasyon ak devlopman konpetans priyorite, pratike disiplin finansye, epi kreye koneksyon ki gen sans. Malgre defi ekonomik yo, chemen pwogrè an Ayiti chaje opòtinite pou moun ki vle sezi li. Avèk detèminasyon ak rezistans, nenpòt moun ka reyalize rèv li, kontribye nan kwasans ak devlopman ekonomik Ayiti pandan l ap reyalize pwogrè pèsonèl ak libète finansye.
